Senwes Uitvoerende Komitee

Corné het 17 jaar ondervinding in verskeie segmente van die besigheid. Hy is die afgelope vyf jaar al in die pos van hoof finansiële beampte van die maatskappy en verseker dat besigheidsbesluite gebaseer word op gesonde finansiële kriteria en verskaf insig en analise om die hoof uitvoerende beampte en ander senior bestuurders te ondersteun. Hy lei ook belangrike finansiële inisiatiewe wat die oorhoofse strategiese doelwitte en uitvoerende strategieë wat deur die HUB gestel word, ondersteun.

Christo is die besturende direkteur van Tradevantage sedert die stigting van die maatskappy in November 2013. Hy het ook meer as 22 jaar se bestuursondervinding, wat 20 jaar se ondervinding in die graanverhandelingsomgewing insluit. Sy verantwoordelikhede by Tradevantage sluit in die ontwerp en implementering van 'n strategie wat die behaling van Tradevantage se doelwitte sal verseker, die stel van finansiële doelwitte en die bestuur van die vordering daarmee. Hy moet ook ’n omgewing skep waarin graanverhandelaars genoeg beweegruimte het om hul vaardighede te optimaliseer binne 'n aanvaarbare risiko-omgewing.

Wikus kombineer sewe jaar se ouditondervinding met 13 jaar se ondervinding in graanbestuur, risikobestuur en finansiële en tesouriebestuur. Sy verantwoordelikhede by Senwes Finansies en Tesourie sluit in oorsig oor die voorbereiding van die interim en jaarlikse finansiële state, die groepbegroting en alle aspekte wat verband hou met belasting en die bestuur van die tesouriefunksie.

Elmarie het 25 jaar ondervinding in die kommersiële-, landbou- en regs-kommersiële praktyk en besigheidsektore. Sy is die spanleier van die interne regspan en het oorsig oor alle regs- en korporatiewe beheersake van die Senwes groep sowel as die groepsekretariaat, wat insluit beleggersdienste, korporatiewe beheer beste praktyke, groepnakoming, korporatiewe besigheidsadministrasie en groep korporatiewe aksies.

Johan bring 12 jaar se ouditondervinding en 26 jaar se ondervinding in ekonomiese uitvoerbaarheidstudies en navorsing na die tafel. Hy is verantwoordelik vir Senwes Korporatiewe Finansies en sy verantwoordelikhede behels analises van die uitvoerbaarheid van maatskappystrategie, aanbevelings oor potensiële lewensvatbare projekte, die verskaffing van besigheidsintelligensie en analises van klantebesigheid met die maatskappy, sowel as analises van die finansiële en ander prestasieareas van mededingers.

Pieter het 25 jaar se landbouondervinding wat verband hou met graanverkryging en -verhandeling en die hantering en opberging van sagtekommoditeite - wat tien jaar se binnelandse en internasionale logistieke ondervinding en agt jaar se ondervinding in die saadbedryf insluit. Sy verantwoordelikhede sluit in strategiese rigtinggewing aan Grainlink Silobedryf ten einde groei en volhoubaarheid vir die lang termyn, sowel as die bestuur daarvan te verseker. Hy moet ook verseker dat begrotings en doelwitte behaal word deur die optimale gebruik van alle hulpbronne en die vestiging en bestuur van verhoudings met relevante belanghebbendes, rolspelers en instansies.

Dirk het 27 jaar se interne ouditondervinding, waarvan 15 jaar in forensiese ondersoeke was. Sy verantwoordelikhede by Senwes Interne Oudit en Gerusstelling sluit in die bestuur van die interne oudit- en forensiese ondersoekfunksies, beplanning en koördinering van die gekombineerde gerusstellingsfunksie en gekombineerde gerusstellingsrapportering aan die direksie.

Ferdie het 24 jaar meganisasie-ondervinding wat insluit verkope, onderdele, administrasie, voorraadbeheer en -bestuur. Hy is verantwoordelik vir Senwes Equipment en sy verantwoordelikhede is die ontwikkeling van ’n strategie om die afdeling te laat groei en om winsgewendheid te verhoog, oorsig oor die uitvoering van alle strategiese planne en aksies, die optimalisering van alle bedryfsaktiwiteite, die meting en beheer van alle aktiwiteite, skakeling met relevante verskaffers en die optimalisering van die verskaffing van produkte.

Alf kombineer agt jaar se bestuursondervinding in die mediese en landbou-omgewings met vyf jaar se ondervinding in stelselontwerp, -ontwikkeling en -implementering. Hy is verantwoordelik vir die Senwes groep inligtingstegnologiestelsels en moet verseker dat toepaslike tegnologie regdeur die groep gebruik word en dat dit belyn is met huidige besigheidsvereistes en die strategie vir die toekoms.