Hierdie transaksie is in lyn met beide partye se strategieë om te groei en om terselfdertyd in ʼn uiters mededingende globale besigheidsomgewing optimaal besigheid te bedryf. Die transaksie is so gestruktureer dat Senwes en NWK gelyke aandeelhouding in die gesamentlike besigheid sal hê.
“Die versekeringsbesigheid lewer finansiële advies en dienste aan veral landbouprodusente en dit maak kommersieel sin om voordele van skaal tussen ons te bewerkstellig,” het Danie Marais, die Besturende Direkteur van NWK, gesê. Voorts, omdat die twee besighede beide korttermyn-, langtermyn- en oesversekering bemark en hanteer en met groot mededingers in die finansiële sektor kompeteer, kan wesentlike sinergie en besparings tot voordeel van alle belanghebbendes bewerkstellig word.
“Alhoewel die versekeringsbesigheid ʼn kleiner rolspeler in ons besigheid is, is dit ʼn onmisbare en kritiese deel van beide ʼn landbouprodusent se portefeulje en risikobestuur, asook dié van sy finansierder en ons voorsien om deur hierdie samesmelting die klantebasis met meer mededingende en innoverende produkaanbiedings en premies te diens,” het Francois Strydom, die Besturende Direkteur van Senwes, bygevoeg.
Die transaksie sal binnekort geïmplementeer word aangesien dit nie onderhewig is aan regulatoriese goedkeurings nie. Die partye het voorts aangekondig dat Daan Hugo uit die NWK stal aangestel is as besturende direkteur van die gesamentlike versekeringsbesigheid.
Daan Hugo, wat aangestel is as besturende direkteur van Senwes en NWK se nuwe versekeringsbesigheid.
NAVRAE
EM Joynt (Senwes), Maatskappysekretaris en Regsadviseur
Tel + 27 18 464 7104
elmarie.joynt@senwes.co.za